VOA | မြန်မာနိုင်ငံသားတွေ အများစုနေထိုင်တဲ့ အမေရိကန်ပြည်ထောင်စု အင်ဒီးယားနား ပြည်နယ် ဖို့ဒ်ဝိန်း မြို့က မြန်မာ ကလေးငယ်တွေ အတွက် စားသုံးလေ့ရှိတဲ့ မြန်မာ နိုင်ငံထုတ် အစာကြေဆေးနှစ်မျိုးမှာ ခဲနဲ့ အာဆင်းနစ် အဆိပ်သင့်တာတွေ စမ်းသပ်တွေ့နေရတဲ့ အတွက် မစားဘဲရှောင်ဘို့ ဖို့ဒ်ဝိန်းမြို့ ကျန်းမာရေး စောင့်ရှောက်မှု အသင်းတွေက သတိပေးထားပါတယ်။ အသေးစိတ်ကို ကိုသိန်းထိုက်ဦးက တင်ပြပေးထားပါတယ်။
 အဆိပ်သင့်ဆေးတမျိုးဖြစ်သော ဒေါ်တွေ ဂေါမုတ္တဆေး။ |
“ဖို့ဒ်ဝိန်းမြို့ကို ဒုက္ခသည်အဖြစ် ရောက်လာတဲ့ ကလေးငယ်တွေအားလုံးကို ကျမတို့ စစ်ဆေး ကြည့်ပါတယ်။ သူတို့မှာ ခဲအဆိပ်သင့်တာ ရှိမရှိ စစ်ဆေး ကြည့်တာပါ။ မြန်မာတွေထဲမှာ ခဲဆိပ်သင့်နေတဲ့ ကလေးငယ် အရေအတွက် တော်တော်များတာကို ကျမတို့ တွေ့ရပါတယ်။ ဒီလိုတွေ့ပြီဆိုရင် ကလေးတွေရဲ့ အိမ်တွေကို သွားပြီး သူတို့ဘာစားတယ်၊ ဆေးတွေ ဘာတွေသုံးတယ် ဆိုတာတွေကို မေးမြန်း စစ်ဆေးပါတယ်။”
ကလေးငယ်တွေ ခဲဆိပ်သင့်တာတွေကို တွေ့ပြီဆိုရင် အစားအသောက်တွေ၊ ဆေးတွေကို စစ်ဆေးတာတွေ အပြင် အိမ်တွေမှာ ဆေးသုတ် ထားတဲ့ နံရံတွေကိုလည်း စစ်ဆေးတဲ့ အကြောင်း St. Joseph Community ကျန်းမာရေးစောင့်ရှောက်မှုအသင်းက
လောရင်း ဟက်ဂါတီက ရှင်းပြပါတယ်။
မြန်မာမိသားစုတွေ အများဆုံးနေထိုင်တဲ့ တိုက်ခန်း ၂၀၀ လောက်ကို တခန်းဝင် တခန်းထွက် စစ်ဆေးခဲ့တာ လို့လည်း ပြောပါတယ်။ မြန်မာကလေးငယ်တွေ ဖျားနာတာ၊ ခဲဆိပ်နဲ့ အာဆင်းနစ် အဆိပ်သင့်တာတွေ ရှိလာ နေတာကို ဖို့ဒ်ဝိန်းမြို့ကို ရောက်လာတဲ့ မြန်မာနိုင်ငံသားတွေ အကြား ပြီးခဲ့တဲ့ လပိုင်းတွေအတွင်းမှာ ပိုပြီး အာရုံစိုက် လာခဲ့တယ်လို့ ဖို့ဒ်ဝိန်းမြို့ခံတယောက်ဖြစ်တဲ့ ဦးခင်ဇော်က ပြောပါတယ်။
“ကျန်ခဲ့တဲ့ နှစ်လလောက်ကတည်းက ခဲဆိပ်သင့်တယ်ဆိုပြီးတော့ ဆေးရုံတွေမှာ ပြဿနာပေါ်တဲ့အတွက် ဒီက တာဝန်ရှိတဲ့ အမေရိကန် ဆရာဝန်တွေနဲ့ ညှိနှိုင်း စည်းဝေးပွဲတခု လုပ်ပါတယ်။ သူတို့ မသင်္ကာတာက ပထမတော့ သနပ်ခါးလိုလို၊ မြန်မာဆေးဝါးလိုလို အဲဒီလို မထင်မရှားဖြစ်နေတယ်။ ဒါနဲ့ ပိုသေချာအောင်ဆိုပြီး သူတို့နည်း သူတို့ ဟန်နဲ့ ဒီက ဓာတုဗေဒ ဓာတ်ခွဲခန်းတွေနဲ့ စစ်ဆေး တွက်ချက် ကြည့်တဲ့အခါကြတော့ အခု အဖြေ ထွက်လာတာက မြန်မာဆေးဝါးတွေကနေပြီးတော့ အထူးသဖြင့် ဖြစ်တယ် ဆိုတာကို တွေ့ရလို့ ပညာပေး ပုံလေးတွေနဲ့တကွ အဲဒီ ဂေါမုတ္တ သူငယ်နာချဆေးတို့ အဲဒါတွေကို ပုံနဲ့တကွ ကပ်ပြီးတော့ သတိပေးပြီး အကြောင်းကြားတာ တွေ့ရပါတယ်။”
ဦးခင်ဇော် ပြောသွားတာဖြစ်ပါတယ်။
St. Joseph Community ကျန်းမာရေးစောင့်ရှောက်မှုအသင်းက လောရင်း ဟက်ဂါတီ ကတော့ ခဲဆိပ်သင့်ပြီ ဆိုရင် ကလေးငယ်တွေရဲ့ ဦးနှောက်ဖွံ့ဖြိုးမှု ထိခိုက်နိုင်တဲ့အတွက် သတိထားပြီး စောင့်ရှောက်ဖို့လိုအပ်တယ်လို့ ပြောပါတယ်။
“အဆိပ်သင့်ပြီဆိုရင် အဆိပ်က ဦးနှောက်နဲ့ ကိုယ်ခန္ဓာထဲက အရေးကြီးတဲ့ အစိတ်အပိုင်းတွေကို သွားပြီး ကျယ်ကျယ်ပြန့်ပြန့် ထိခိုက်နိုင်ပါတယ်။ ဖွံ့ဖြိုးမှုတွေက အရွယ်ရောက်တဲ့ အခါ ရှိသင့်သလို ရှိမလာတော့ပါဘူး။ ကလေးတွေအနေနဲ့ ကိုယ်ခန္ဓာချည့်နဲ့
တာတွေ၊ စကားပြောနောက်ကျတာတွေ အဖြစ်များပါတယ်။ ဖြစ်တာကို သိသိချင်း ဘေးဖြစ်စေမယ့် အစားအစာ သုံးစွဲတာကို ချက်ချင်းရပ်ဆိုင်းဖို့ လိုပါတယ်။ နောက်ကလေးငယ်တွေကို အာဟာရဖြစ်စေမယ့် အစားအစာ တွေကျွေးပြီး ပြုစုစောင့်ရှောက်ဖို့ လိုပါတယ်။”
ခဲဆိပ်သင့်တဲ့ ကလေးငယ်ရဲ့ သွေးထဲမှာ လည်ပတ်နေမယ့် ခဲဆိပ်ပမာဏကို လျှော့ချပစ်ဖို့၊ အမြဲတစေ စောင့်ကြည့်ပြီး အဆိပ်သင့်စေတဲ့ အစားအစာတွေကို ရှောင်ရှားဖို့နဲ့ လိုအပ်ရင် ဆေးရုံမှာထားပြီး ကုသရတာတွေရှိတယ်လို့ လောရင်း ဟက်ဂါတီက ပြောပါတယ်။
အခုတော့ ဘေးဖြစ်စေနိုင်တယ်ဆိုတဲ့ ဒေါ်တွေ ဂေါမုတ္တဆေးနဲ့ ဒေါ်ကျင် သူငယ်နာ ၀မ်းနုတ်ဆေးတွေကို ဖို့ဒ်ဝိန်းမြို့ မြန်မာဈေးဆိုင် တွေမှာ မရောင်းဘို့လည်း သတိပေး ထားပါတယ်။ နောက်ထပ် ဖို့ဒ်ဝိန်းမြို့ခံ တယောက်ဖြစ်တဲ့ ကိုသိန်းထွန်းအောင်ကလည်း ဘေးဖြစ်စေ တတ်တဲ့ ဆေးတွေကို အရင်ကရောင်းခဲ့တဲ့ နေရာတွေနဲ့ ဖို့ဒ်ဝိန်းမြို့အတွင်း ဖြန့်ဝေထားတဲ့ သတိပေးချက်တွေနဲ့ ပတ်သက်လို့ အခုလိုပြောပါတယ်။
“ဒီဆေးဝါးတွေကို သုံးတဲ့အခါ ဘာတွေဖြစ်လာမလဲဆိုတဲ့ဟာ၊ ဘာဓာတ်တွေပါတယ် ဆိုတာ အဲဒီထဲမှာ ထည့်ရေးထားတယ်။ ဒီဆေးဝါးတွေနဲ့ပတ်သက်ပြီး သိချင်ရင် ဖုန်းနံပါတ်တွေ ထည့်ပေးထားတယ်။ ဘယ်ဖုန်းကို ဆက်သွယ်ပါပေါ့။ ဆက်သွယ်ပြီး မေးနိုင်ပါတယ် ဆိုပြီး အဲဒီစာထဲမှာ ထည့်ရေးထားတယ်။ ရောဂါအနေနဲ့ သူတို့ပြောတာ ကတော့ ကလေးဖွံ့ဖြိုးမှုတွေ နည်းသွားတာပေါ့။ အဓိက ဦးနှောက်ဖွံ့ဖြိုးမှုပေါ့။ ဦးနှောက် ဖွံ့ဖြိုးမှုမှာ ရူးသွပ်သွပ်ဖြစ်သွားတာတို့ဘာတို့ အဲလိုမျိုးတွေ ဖြစ်တတ်တယ်။”
အင်ဒီးယားနားပြည်နယ် ဖို့ဒ်ဝိန်းမြို့ ဒေသခံတယောက်ဖြစ်တဲ့ ကိုသိန်းထွန်းအောင် ပြောသွားတာ ဖြစ်ပါတယ်။
မြန်မာနိုင်ငံက အစားအစာတွေ၊ ဆေးတွေနဲ့ပတ်သက်လို့ ဘေးဖြစ်စေနိုင်တဲ့အကြောင်း ဘယ်အစားအသောက်၊ ဆေးဝါးလို့ နာမည်တပ်ပြီး အတိအကျ ကြေညာတာဟာ အမေရိကန်ပြည်ထောင်စုမှာ အခုတကြိမ် ပထမဆုံး အကြိမ် သတိပေးတာလို့ ပြောနိုင်ပါတယ်။
မကြာသေးခင်တုန်းကပဲ မြန်မာနိုင်ငံအတွင်းမှာ လက်ဖက်တွေကို ဆိုးဆေးတွေသုံးပြီး ထုတ်နေတာ တွေ့ရတဲ့ အတွက် ဘေးဖြစ်စေနိုင်တဲ့ အကြောင်း စမ်းသပ်တွေ့ရတယ် ဆိုပြီး မြန်မာကျန်းမာရေးအရာရှိတွေ သတိပေးခဲ့ ပါတယ်။
source by : http://www.voanews.com/burmese/2009-03-24-voa3.cfm
0 comments:
Post a Comment