သတင်း RFA | ချင်းပြည်နယ်နဲ့ အိန္ဒိယနိုင်ငံနယ်စပ် ဒိုးရှောင်ဝ စခန်းမှာ တာဝန်ကျနေတဲ့ ပုဏ္ဏားကျွန်းမြို့ အခြေစိုက် ခလရ ၅၀၅ တပ်ရင်းက ဗိုလ်ကြီး ကျော်သူရဟာ နယ်စပ်ဒေသက တိုင်းရင်းသားတွေကို ညှဉ်းပန်း နှိပ်စက်တာတွေ များလွန်းတဲ့အတွက် မခံမရပ်နိုင်ဖြစ်ပြီး ရခိုင်ပြည် လွတ်မြောက်ရေးပါတီ (အေအယ်ပီ) လက်နက်ကိုင် တွေက၊ နိုဘာလ ၁၉ ရက်နေ့က ဝင်ရောက် တိုက်ခိုက်ရာမှာ ခလရ ၅၀၅ တပ်ခွဲမှ စစ်သား ၃ဦး အပြင်းအထန် ဒဏ်ရာ ရရှိသွားတယ်လို့ ဒီနယ်စပ်က ဒုက္ခသည်တွေကို အေအယ်ပီနဲ့ အတူ တွဲဖက်ပြီး ကူညီ စောင့်ရှောက်မှု ပေးနေတဲ့ ဖရီးဘားမားရိန်းဂျား အဖွဲ့က တာဝန်ခံ ကိုစိုးနိုင်က အာအက်ဖ်အေကို ပြောပါတယ်။
 တောနယ် ဒေသတခုတွင် တိုက်ကင်းလှည့်နေသော စစ်အစိုးရ တပ်ဖွဲ့တခု ဖြစ်ပါသည်။ (Photo: AFP) |
တိုက်ပွဲဖြစ်ပွားတာ နာရီဝက်ခန့်ကြာပြီး နောက်ပိုင်းမှာ လက်နက်ကြီးတွေနဲ့ ပြန်လှန် ပစ်ခတ်ခဲ့ပေမဲ့ အေအယ်ပီဘက်ကတော့ ထိခိုက် ဒဏ်ရာရတာ မရှိဘူးလို့ သိရပါတယ်။ အဲဒီ စစ်အရာရှိ ရက်စက် ဆိုးသွမ်းပုံတွေနဲ့ ပတ်သက်ပြီးတော့လည်း ကိုစိုးနိုင်က အခုလို ဆက်ပြောပြပါတယ်။
ကိုစိုးနိုင်။ ။ “ အဲဒီ ဗိုလ်ကြီး ကျော်သူရဟာတဲ့ အဲဒီမှာကျတဲ့ စစ်ဗိုလ်တွေရဲ့ တလျှောက်လုံးမှာ သူဟာ အဆိုးဆုံးလို့ ဖြစ်တယ်တဲ့။ ပေါ်တာသမားတွေ နောက်ကျ တာတို့၊ ရွာသူကြီးတို့ ခေါ်တာတွေ၊ ဥက္ကဋ္ဌ၊ အတွင်းရေးမှူးကို ခေါ်တဲ့အချိန်မှာ နောက်ကျလို့ရှိရင်တဲ့ အဲဒီ ဖားခုန်ခိုင်းတာတို့၊ နေပူလှန်းခိုင်းတာတို့ နောက်ပြီးရင် ရိုက်တာတို့၊ ပုတ်တာတို့ အဲဒီအမျိုးမျိုး ပြစ်ဒဏ်ပေးတာတွေကို လုပ်တယ်တဲ့။ ”
ခုလို ဝင်ရောက်တိုက်ခိုက်တာဟာ မတရားမှုတွေကို ဆက်တိုက်လုပ်လွန်းတဲ့အတွက် မခံနိုင်လို့ ဝင်တိုက်တာလို့ ဆက်ပြောပြ ပါတယ်။
0 comments:
Post a Comment