အရံ မီးသတ် တပ်ဖွဲ့ သင်တန်းခေါ်ပြီး ပြည်သူ့ စစ်ကဲ့သို့ စစ်ရေး လေ့ကျင့်ပေးနေ

သျှမ်းသံတော်ဆင့် | သျှမ်းပြည်အရှေ့ပိုင်း တာချီလိတ်မြို့နယ် ကျေးရွာလူထုအား အရံမီးသတ်တပ်ဖွဲ့ နှင့် ကြံ့ခိုင်ဖွံ့ဖြိုးရေးအသင်းထဲ မ၀င်မ နေရ ဟု အာဏာပိုင်များ ဆင့်ခေါ်ကြောင်း၊ အရံမီးသတ်ဟုနာမည်ပေးပြီး ပြည်သူ့စစ်ကဲ့သို့စစ်ရေးလေ့ကျင့်ပေးကြောင်း နယ်စပ် သတင်းရပ်ကွက်ကဆိုပါသည်။

တာချီလိတ်မြို့နယ် မုံးကိုးကျေးရွာအုပ်စုတွင် ကျေးရွာလူထုအား အရံမီးသတ်တပ်ဖွဲ့မ၀င်ပါက ကြံ့ခိုင်ဖွံ့ဖြိုးရေး အသင်းထဲ ၀င်ရမည်ဟု ဧပြီလလယ်ပိုင်းကတည်းက ဒေသခံအာဏာပိုင်များက အတင်းအကျပ်ဆင့်ခေါ်ပြီး အရံမီးသတ်တပ်ဖွဲ့ဝင်သူ များကိုလည်း ပြည်သူ့စစ်သဏ္ဍာန် စစ်ရေးလေ့ကျင့်ခိုင်းသည်ဟု အသက် ၄၀ ကျော် အရွယ် သားသည်မိခင်တဦးက ပြောပါသည်။

“အထက်က အမိန့်ဆိုပြီး ကျေးရွာအုပ်စုဥက္ကဌက ဆင့်ဆိုတယ် ရွာသူကြီးက လူစာရင်းလိုက်ကောက်တယ်။ ရွာတရွာမှာ အိမ်ခြေ ၃၀ ရှိရင် ၁၅ အိမ်က အရံမီးသတ်ထဲ လုံး၀၀င်ရမှာဖြစ်ပြီး ကျန်တဲ့အိမ်တွေက ကြံ့ခိုင်ရေး အသင်း ထဲဝင်ရမယ်တဲ့။ မ၀င်မနေရ ဘဲ။ မီးသတ်တပ်ဖွဲ့ထဲဝင်တဲ့သူတွေ ကိုလဲ ပြည်သူ့စစ်အတိုင်း စစ်ရေး လေ့ကျင့်ခိုင်းတယ်။ မီးသတ်ဖို့တော့ မကျင့် ခိုင်းဘူး။ အခု မုံးကိုးကျေးရွာအုပ်စု ဘော်လုံးကွင်း မှာ အလှည့်ကျ တရွာပြီးတရွာ စစ်ရေးလေ့ကျင့်နေရတယ်” ဟုဆို၏။

ပထမ အသုတ် သင်တန်းပြီး၍ ဒုတိယ အသုတ် စ နေပြီ ဖြစ်ကြောင်း ဒေခံများကဆိုပါသည်။

ဒေသခံလူထုကို အရံမီးသတ်အသင်း၊ ကြံ့ခိုင်ရေးအသင်းထဲဝင်အတင်းအဓမ္မ၀င်ခိုင်းနေခြင်းမှာ ၂၀၁၀ ရွေးကောက်ပွဲ အောင် နိုင်ရေးအတွက် စစ်အစိုးရ စတင်အကောင်အထည်ဖေါ်နေခြင်းသာဖြစ်ကြောင်း လားဟူအမျိုးသားခေါင်းဆောင် ဦးဂျဘိုးလုံ က ဤကဲ့သို့ ပြောသည်။

“အခွင့်အရေးတွေ ဘမ်းပြပေးထားပြီးတော့ တရားသည်ဖြစ်စေ မတရားသည်ဖြစ်စေ ရွေးကောက်ပွဲတွက် လုပ်ခိုင်းမယ်၊ အဲဒါ မျိုးပေါ့၊ လူထုအများစုက မှတ်ပုံတင်မရှိတော့ ကြံ့ခိုင်ရေးအသင်းလူကြီးတွေက အသင်းဝင်ရင် မှတ်ပုံတင်လုပ် ပေးမယ် ဆိုပြီး စည်းရုံးတယ်။ အဲဒါကြောင့် လူတွေကမီးသတ်ထက် ကြံ့ခိုင်ရေး အသင်းကို ပိုဝင်ချင်ကြတယ်။ သဘော က ၂၀၁၀ ရွေးကောက် ပွဲ မနိုင်မရှိအောင် ရွာတိုင်းမှာ သူတို့ လူအမာခံတွေ ရှိထားဖို့ဘဲ”

တာချီလိတ်မြို့နယ် မုံးကိုးကျေးရွာအုပ်စုတွင် ရွာပေါင်း ၅၆ ရွာရှိပြီး တာချီလိတ်မြို့ အထွက်မှ တာလေမြို့ အ၀င်အထိ ကျယ် ၀န်းပါသည်။ နေထိုင်သည့် ဒေသခံအများစုမှာ ရှမ်းနှင့် လားဟူ တို့ဖြစ်ကြသည်။

သျှမ်းပြည်မြောက်ပိုင်း နမ့်ခမ်းမြို့တွင်လည်း ဖေဖေါ်ဝါရီလလယ် ကစပြီး ပြည် သူ့စစ်ကဲ့သို့ စစ်ရေး လေ့ကျင့် နေရသည့် မီးသတ်တပ်ဖွဲ့ ၃ သုတ် လေ့ကျင့် ပြီးစီးသွားပြီဟု သိရပါသည်။

source by : သျှမ်းသံတော်ဆင့်