သန်းထိုက်ဦး | ထိုင်း - မြန်မာနယ်စပ် မယ်လ ဒုက္ခသည်စခန်းတွင် မြန်မာပြည်မှ ထုတ်သည့် ခဲဆိပ် ပါဝင်သော လူသုံးကုန် နှင့် တိုင်းရင်းဆေး တချို့ကို စခန်းအာဏာပိုင်းများက ယခုလ ၂၀ ရက်နေ့တွင် မသုံးစွဲရန် တားမြစ်ပိတ် ပင်ထား ကြောင်း သိရသည်။
 မယ်လ စခန်းတွင်းရှိ ကုန်စုံဆိုင်တဆိုင် (ဓာတ်ပုံ - မိုးကျော်/ဧရာဝတီ) |
မယ်လ ဒုက္ခသည်စခန်း ဒု ဥက္ကဌ ကိုထွန်းထွန်းက ဘန်ကောက်မြို့ အခြေစိုက် အမေရိကန် ပြည်ထောင်စု၏ ဗဟိုရောဂါ ထိန်းချုပ်ရေးစင်တာ (Center of Disease Control - CDC)အဖွဲ့၏ အကူအညီနှင့် လွန်ခဲ့သည့် လဆန်းပိုင်းက အမေရိကန်နိုင်ငံကို ပေးပို့ခဲ့သော နမှုနာ ပစ္စည်းများတွင် ခဲဆိပ်များပါကြောင်း စခန်းကို ပြန်လည် အကြောင်းကြားခဲ့သည့်အတွက် အစည်းအဝေးတွင် ယခုကဲ့သို့ ဆုံးဖြတ်လိုက်ခြင်းဖြစ်သည်ဟု ဧရာဝတီသို့ ပြောသည်။
၎င်းက ဒုက္ခသည်စခန်းတွင် နေထိုင်သူများအား အန္တရာယ်ရှိသည့်အတွက် ရောင်းချခြင်းမပြုရန်နှင့် သုံးစွဲခြင်း များ ကိုလည်း ပိတ်ပင်ထားပြီး အဆိုပါ ထုတ်ပြန်တားမြစ်ချက်ကို လိုက်နာမှု မရှိပါက ထိရောက်စွာ အရေး ယူမည်ဟု ဆိုသည်။
အဆိုပါ မယ်လ ဒုက္ခသည်စခန်းမှ အမေရိကန်နိုင်ငံသို့ ရောက်ရှိသွားသော မြန်မာဒုက္ခသည်များ၏ ကလေး တချို့ တွင် တိုင်းရင်းဆေး ၂ မျိုး ကြောင့် ခဲဆိပ်သင့်ကြောင်း အမေရိကန် ပြည်ထောင်စု၏ ကျန်းမာရေးဌာနက စတင် တွေ့ရှိခဲ့ပြီးနောက် စခန်းတာဝန် ရှိသူများ က ပိတ်ပင်လိုက်ခြင်းဖြစ်သည်။
ယခုလ ၄ ရက်နေ့ထုတ် စစ်အစိုးရ မြန်မာ့အလင်း သတင်းစာတွင် ဈေးကွက်အတွင်း ရောင်းချလျက်ရှိ သော ဒေါ်ထွေး အမှတ်တံဆိပ် ဂေါမုတ္တဆေး နှင့် ဒေါ်ကျင်၏ ကလေးသူငယ်နာ လေပုပ်ထုတ်ဆေးများတွင် အဆိပ် အတောက်ဖြစ်စေ နိုင်သည့် သတ္တုမာ ( Heavy Metal ) များပါဝင်ဖော်စပ်ထားကြောင်း မြန်မာနိုင်ငံ ကျန်းမာရေး ၀န်ကြီးဌာမှ သတိပေးထားသည်။
ထို့အပြင် ယခုကဲ့သို့ တိုင်းရင်းဆေးကြေညာချက်မထွက်ပေါ်ခင် လက်ဖက်နှင့် အကြော်စုံ အမျိုးအစားပေါင်း ၁၀၀ ခန့်တွင် အန္တရာယ်ရှိသော အ၀ါရောင် ဆိုးဆေးသုံးစွဲထားသည့်အတွက် စားသုံးရန်မသင့်ကြောင်း ကြေညာချက် ကိုလည်း ကျန်းမာရေးဝန်ကြီးဌာန က ထုတ်ပြန်ခဲ့သေးသည်။
source by : http://www.irrawaddy.org/bur/index.php?option=com_content&view=article&id=979:2009-04-22-13-15-24&catid=1:news&Itemid=2
0 comments:
Post a Comment