ဂြိုလ်တုစလောင်း စာရင်းကောက် ပြည်သူတွေ စိုးရိမ်

NEJ | ပြီးခဲ့သည့် အပတ်အတွင်း ရန်ကုန်မြို့လည် ဧရိယာတွေမှာ ဂြိုလ်တုစလောင်းတပ်ဆင်မှုနှင့် ပတ်သက်ပြီး လိုက်လံစာရင်းကောက်ယူမှုတွေ ရှိနေတာကြောင့် ပြည်သူတွေအကြား စိုးရိမ်ထိတ်လန့်မှုများ ရှိနေကြောင်း စုံစမ်းသိရသည်။

ဗိုလ်တစ်ထောင်မြို့နယ် (၄၁) လမ်းအတွင်း နေထိုင်သူတစ်ဦးက “ကျွန်တော်တို့ ရပ်ကွက်မှာ ဆက်သွယ်ရေးက ဝန်ထမ်းတစ်ယောက်၊ ရပ်ကွက် ရယက က တာဝန်ပေးသူတစ်ယောက်၊ ကြံ့ဖွံ့ တစ်ယောက် ပါတဲ့ အဖွဲ့က စာရင်းလာကောက်သွားတယ်။ သူတို့စာရင်းကောက်တာက တစ်အိမ်တက်ဆင်း လိုက်ပြီး ဘယ်အိမ် စလောင်းရှိ သလဲ မေးတာမျိုး မဟုတ်ဘူး။ ခေါင်မိုးတွေပေါ်ကြည့်တယ်၊ ဂြိုလ်တုစလောင်း ထောင်ထားရင် တိုက်နံပါတ် ဘယ်လောက် အပေါ်မှာ စလောင်း ဘယ်နှစ်ခု ထောင်ထားသလဲ စာရင်းဖြည့်တယ်။ အဲဒီပုံစံ အဖွဲ့လေးတွေ ခွဲပြီး စာရင်းလိုက်ကောက်တာ၊ ဘာလုပ်ဖို့ လိုက်ကောက်တာလဲလို့ ကျွန်တော်ကမေးတော့ အထက်က ကောက်ခိုင်းလို့ ကောက်တာ၊ မသိဘူးလို့တော့ ဖြေတယ်” ဆိုပြီး ပြောပြသည်။

ယခုလို ဂြိုလ်တုစလောင်း တပ်ဆင်ထားမှု စာရင်းလိုက်လံ ကောက်ယူမှုကြောင့် အချို့ စလောင်းကို ဖြုတ်သိမ်းသူများပင် ရှိနေကြောင်းလည်း စုံစမ်းသိရသည်။ ပုဇွန်တောင်မြို့နယ် အတွင်း နေထိုင်သူတစ်ဦးက ယခုလို စာရင်းလိုက်လံကောက်ခံမှုကို တွေ့တာကြောင့် ၄င်းအိမ် မှာ တပ်ဆင်ထားသည့် ဂြိုလ်တုစလောင်းနှင့် ဆက်စပ်ထားသည့် ကြိုးများကို ဖြုတ်ပစ်လိုက်ပြီး ဖမ်းစက်များကိုလည်း သိမ်းထားလိုက်ကြောင်း၊ ခေါင်မိုးပေါ်က စလောင်းပြားကိုတော့ သိမ်းချင်သိမ်းပါစေဆိုပြီး ထားလိုက်ကြောင်း ပြောပြသည်။

ရန်ကုန်မြို့ ဆင်ခြေဖုံးမြို့နယ်များမှာ အိမ်ထောင်စုတွေ၏ ပိုင်ဆိုင်မှု အလုပ်လုပ်ကိုင်မှုတွေနှင့် ပတ်သက်ပြီး စာရင်းကောက်ခံစဉ် အချိန်ကလည်း ဂြိုလ်တုစလောင်း တပ်ဆင်ထားခြင်း ရှိမရှိ မေးမြန်းပြီး အချက်အလက်တွေ ကောက်ယူသွားခဲ့ဖူးသည်။

နအဖ စစ်အစိုးရသည် ပြီးခဲ့တဲ့နှစ်ကအထိ ဂြိုလ်တုစလောင်း တပ်ဆင်မှုတွေကို လိုင်စင်ဖြင့် ခွင့်ပြုပေးပြီး နှစ်စဉ်ကြေး ကောက်ခံသည်။ ၂ဝဝ၈ နှစ်ဆန်းမှာတော့ ပထမ နှစ်စဉ်ကြေးကို တစ်နှစ် ကျပ်(၁ဝ) သိန်းအထိ တိုးမြှင့်ကောက်ခံရမည်ဆိ်ုပြီး ပြည်နယ်တိုင်းများရှိ မြို့အသီးသီးက ဆက်သွယ်ရေးရုံးတွေထံ ညွှန်ကြားချက် ပို့ခဲ့သည်။ နောက်ပိုင်း အဆိုပါကိစ္စ ပြင်ပမီဒီယာတွေကနေ ကျယ်ကျယ်ပြန့်ပြန့် ဝေဖန်သည့်အတွက့် လိုင်စင် သက်တမ်းတိုးခြင်း ကို လုပ်မပေးတော့ဘဲနေတာ ယနေ့အထိ ဖြစ်သည်။

လိုင်စင်သက်တမ်း ထပ်တိုးမပေးခြင်းကြောင့် မြန်မာတစ်နိုင်ငံလုံးမှာ တပ်ဆင်ထားသည့် သိန်းနှင့်ချီရှိသည့် ဂြိုလ်တုစလောင်းဖမ်းစက်တွေ သက်တမ်းကုန်ဆုံးပြီး တရားမဝင် တပ်ဆင်ထားသည့် သဘော သက်ရောက်သွားသည်။

စစ်အစိုးရ ဆက်သွယ်ရေး ဥပဒေအရ တရားမဝင် ဂြိုလ်တုစလောင်း တပ်ဆင်ထားမှုကို တွေ့ရှိပါက ဆက်စပ် ပစ္စည်းတွေကို နိုင်ငံပိုင်သိမ်းမည့်အပြင် တပ်ဆင်ကြည့်ရှုသူကိုလည်း အမြင့်ဆုံးထောင်ဒဏ် (၇) နှစ်အထိ အပြစ်ပေးနိုင်သည်ဟု ပြဌာန်းထားသည်။

ပြီးခဲ့တဲ့ ၂ဝဝ၈ မေလ နာဂစ်မုန်တိုင်း တိုက်ခတ်မှု ဖြစ်ပွားပြီးနောက် မုန်တိုင်းဒဏ်ခံရသည့် ဧရာဝတီတိုင်းနှင့် ရန်ကုန်တိုင်းရှိ နေအိမ်တွေမှာ တပ်ဆင်ထားသည့် စလောင်းအရွက်တွေ အားလုံးနီးပါး ပျက်စီးကုန်သည်။ နောက်ပိုင်း အလျင်အမြန် ပြန်လည် တပ်ဆင်ကြသည့် အတွက် စလောင်း အရွက်ဈေးနှုန်းတွေ မြင့်တက် ကုန်သည်။

သို့သော် ပြည်သူတွေ စလောင်းပြန်လည်တပ်ဆင်တာကို မလိုလားတဲ့ စစ်အစိုးရ အာဏာပိုင်တွေဟာ ဗိုလ်ဆွန်ပက်လမ်းနဲ့ ဘားလမ်းက ဂြိုလ်တုစလောင်း ရောင်းတဲ့ လျှပ်စစ်ပစ္စည်းဆိုင်တွေကို ဝင်ရောက် ဖမ်းဆီးတာ လုပ်ခဲ့သည်ဟု မြိုခံတွေက ပြောသည်။ ဂြိုလ်တုစလောင်းနှင့် ဆက်စပ်ပစ္စည်းတွေကို သိမ်းဆည်းသွားသည့်အပြင် ဆိုင်ပိုင်ရှင် တွေကိုလည်း ခေတ္တ ထိမ်းသိမ်းထားခဲ့သေးသည်။ နောက်ပိုင်း ရန်ကုန်မှာ ဂြိုလ်တုစလောင်း ရောင်းချခြင်းနှင့် တပ်ဆင်ခြင်းလုပ်ငန်းမှာ မှောင်ခိုသဘော ဖြစ်သွားသည်။

စစ်အစိုးရ အာဏာပိုင်တွေ ယခုကဲ့သို့ ဂြိုလ်တုစလောင်း စာရင်းကောက်ယူနေချိန်သည် အမေရိကန် အခြေစိုက် ဗွီအိုအေ အသံလွှင့်ဌာနက ဂြိုလ်တုစလောင်းမှတဆင့် ရုပ်သံသတင်း စတင် ထုတ်လွှင့်မည့်အချိန်နှင့်လည်း တိုက်ဆိုင်နေသည်။ မူလက နော်ဝေ အခြေစိုက် ဒီဗွီဘီသာ ဂြိုလ်တုစလောင်းမှ ရုပ်သံလွှင့်မှု ရှိနေခဲ့ပြီး၊ ယခု ဗွီအိုအေ ကပါ ထုတ်လွှင့်လာ သည့်အတွက် စစ်အစိုးရက ပိတ်ပင်မည့်သဘောမျိုးလည်း ဖြစ်နိုင်ကြောင်း အချို့ရန်ကုန် မြို့ခံတွေက သုံးသပ်နေကြသည်။

source by : http://www.khitpyaing.org/news/February_09/18-2-09e.php