ဘန်ကီမွန်း မြန်မာပြည် မသွားပါ

သတင်း မုံပီး မဇ္ဈိမ | နယူးဒေလီ။ ။ ကုလအတွင်းရေးမှူးချုပ်ကို မြန်မာနိုင်ငံသို့ သွားရောက်ကာ နိုင်ငံရေး အကျဉ်းသားများ လွတ်မြောက်ရေးအတွက် မြန်မာအစိုးရကို တိုက်တွန်းရန် နိုင်ငံပေါင်း ၁၁၀ ကျော်က ခေါင်းဆောင်ဟောင်းများက တိုက်တွန်း ခဲ့သော်လည်း ယခုအခါ သွားရောက်ဦးမည် မဟုတ်ကြောင်း ယမန်နေ့ကပင် ပြောကြားလိုက်သည်။

ဒေါ်အောင်ဆန်းစုကြည် အပါအ၀င် နိုင်ငံရေးအကျဉ်းသားများ လွတ်မြောက်ရေးအတွက် ကြိုးပမ်းပေးရန် နိုင်ငံ့ခေါင်းဆောင်ဟောင်းကြီး ၁၁၂ ဦးက တောင်းဆိုခဲ့ပြီးနောက် မစ္စတာဘန်၏ ပြောခွင့်ရပုဂ္ဂိုလ် မစ်ချဲလ် မွန်တက်စ်က အဓိပ္ပာယ်ရှိသော ရလဒ်မျိုး ပေါ်ထွက်လာစရာ အကျိုးအကြောင်းဆီလျော်သည့် မျှော်လင့်ချက် မရှိသရွေ့ သွားရောက်ဦးမည် မဟုတ်ကြောင်း တုံ့ပြန် ပြောကြားလိုက်ခြင်း ဖြစ်သည်။

တိုက်တွန်းစာကို နော်ဝေး၀န်ကြီးချုပ်ဟောင်းက စတင်အဆိုပြုခဲ့ပြီး အမေရိကန်သမတ ဂျော့လ်ဒဗလျူဘုရှ်၊ သမတဟောင်း ဂျင်မီကာတာ၊ ဗြိတိန် ၀န်ကြီးချုပ်ဟောင်းများဖြစ်သည့် တိုနီဘလဲ၊ မာဂရက်သက်ချာ၊ ဂျွန်မေဂျာနှင့် ဆိုဗီယက် ခေါင်းဆောင်ဟောင်း မီခေးလ်ဂေါ်ဘာချက်တို့လည်း ပါဝင် လက်မှတ်ရေးထိုးခဲ့သည်။

မစ္စတာ ဘန်ကီမွန်းအနေဖြင့် မြန်မာနိုင်ငံသို့ နောက်တခါ သွားရောက်လိုပြီး ကျယ်ပြန့်စွာ ဆွေးနွေးလိုပါသည်ဟု မစ်ချဲလ်က ဖြည့်စွက် ပြောဆိုသည်။ ထို့အပြင် အထွေထွေ အတွင်းရေးမှူးချုပ်၏ မြန်မာနိုင်ငံဆိုင်ရာ အထူးကိုယ်စားလှယ် ဂမ်ဘာရီသည်လည်း မြန်မာနိုင်ငံအတွင်း နိုင်ငံရေး ပြုပြင်ပြောင်းလဲမှုတွင် တိုးတက်သည့် ခြေလှမ်းမျိုး အမှန်တကယ် ဖြစ်နိုင်စွမ်းရှိမှသာ သွားရောက်မည်ဟုလည်း ဆိုသည်။

စာရေးသားတိုက်တွန်းမှုကို အစပျိုးခဲ့သူ နော်ဝေ ဝန်ကြီးချုပ်ဟောင်းက ဘန်ကီမွန်းထံ ယမန်နေ့က ဖုံးဖြင့် တိုက်တွန်းစကား ပြောကြားခဲ့ သေးသလို၊ တိုက်တွန်းစာထဲတွင် မြန်မာပြည်သို့ သွားသည်ဖြစ်စေ၊ မသွားဖြစ်စေ နိုင်ငံရေးအကျဉ်းသားများ လွတ်မြောက်ရေးအတွက် လုပ်ဆောင်ပါရန် ပန်ကြားထားသည်။

ယခုလို တိုက်တွန်းချက်နှင့် တုံ့ပြန်မှုသည် မြန်မာစစ်အစိုးရက သဘောကွဲလွဲသူများကို နှစ်ရှည်ထောင်များ ချမှတ်ပြီး ဝေးလံခေါင်ဖျား ဒေသရှိ အကျဉ်းထောင်များသို့ ပို့ဆောင်နေစဉ် ထွက်ပေါ်လာခြင်း ဖြစ်သည်။

ယမန်နေ့ကပင် နာမည်ကျော် ဟစ်ဟော့အဆိုတော် ကိုဇေယျာသော်ကို မြန်မာပြည်တောင်ဘက်စွန်း ကော့သောင်းထောင်သို့ ပြောင်းရွှေ့လိုက်သည်။