ဝက်တုပ်ကွေး အဆင့် ၅ အထိ ရောက်ပြီ

ကိုဝိုင်း | ချင်းမိုင် (မဇ္ဈိမသတင်းဌာန)။ ။ ဝက်တုပ်ကွေးရောဂါသည် လူအချင်းချင်း ကူးစက်ပျံ့နှံ့နိုင်သည့် စိုးရိမ်ရမှု အဆင့် ၅ သို့ ရောက်ပြီဖြစ်ကြောင်း ကမ္ဘာ့ ကျန်းမာရေးအဖွဲ့ကြီးက ယမန်နေ့က ထုတ်ပြန် ပြောဆိုလိုက်သည်။

အဆင့် ၅ ၏ အဓိပ္ပါယ်မှာ လူမှ လူသို့ ရောဂါ ကူးစက်နိုင်စွမ်းရှိပြီး အနည်းဆုံး နိုင်ငံ ၂ နိုင်ငံတွင် ရောဂါ ပျံ့နှံ့မှု ဖြစ်နိုင်ခြင်းဖြစ်သည်။ ကမ္ဘာလုံးဆိုင်ရာ ကပ်ရောဂါဟု သတ်မှတ်နိုင်သည့် အဆင့်ရောက်ရန် တဆင့်သာ လိုတော့သည်။

အဖွဲ့၏ ထုတ်ပြန်ချက်အတွင်း၌ “ဗိုင်းရပ်စ်အသစ်နဲ့ ပတ်သက်ပြီး ကောင်းကောင်း နားမလည်ကြသေးဘူးဆိုတာ သတိပေးချင်ပါတယ်။ တုပ်ကွေးပိုးတွေရဲ့ သဘာဝဟာ အပြောင်းအလဲ မြန်ဆန်ပြီး၊ သူတို့ရဲ့ အနေအထားကို ကြိုတင် ခန့်မှန်းလို့ မရနိုင်ပါဘူး” ဟု WHO အထွေထွေ ညွှန်ကြားရေးမှူးချုပ် ဒေါက်တာ မာဂရက် ချန်း Margaret Chan က ပြောထားသည်။

၂ဝဝ၅ ခုနှစ် ကြက်ငှက်တုပ်ကွေး ဖြစ်ပွားစဉ်က သတ်မှတ်ခဲ့သည့် စိုးရိမ်ရမှု ၆ ဆင့်အနက် ဝက်တုပ်ကွေး၏ လက်ရှိ အနေအထားကို ဖော်ပြလိုက်ခြင်းဖြစ်ကာ မက္ကဆီကိုအပြင် အခြားနိုင်ငံအချို့တွင်လည်း လူအချင်းချင်း ကူးစက်နိုင်သည့် အနေအထားသို့ ရောက်ရှိလာသဖြင့် ကြီးမားသည့် ကပ်ဘေးတခုအသွင် ဆောင်နေကြောင်း ကမ္ဘာတဝှမ်းသို့ တပ်လှန့်သတိပေးလိုက်ခြင်းလည်း ဖြစ်သည်။

နိုင်ငံအားလုံးအနေဖြင့် ကူးစက် ရောဂါ ကာကွယ်ရေး အစီအစဉ် များကို ချက်ချင်း လုပ်ဆောင် သင့်ကြောင်း နှင့် သာမန် မဟုတ်ဘဲ ပြင်းထန်သည့် အဆုတ်ယောင် ရောဂါနှင့် အပူဖျားကဲ့သို့ လက္ခဏာ ရှိသော ယခု တုပ်ကွေး ဖြစ်ပွားမှု အပေါ် ဆက်လက် သတိထားရန် လိုအပ်ကြောင်း WHO ၏ ထုတ်ပြန် ချက်တွင် ဖော်ပြ ထားသည်။

မက္ကဆီကိုနိုင်ငံသား ၂၃ လသား အရွယ် ကလေးငယ် တဦး အမေရိကန် နိုင်ငံ တက္ကဆက် ပြည်နယ် ဟောက်စတန် ဆေးရုံတွင် အဆိုပါ ဗိုင်းရပ်စ် ကြောင့် ယခုလ ၂၇ ရက်နေ့က သေဆုံးပြီးနောက် WHO ၏ ယခု ကြေညာချက်ထွက်ပေါ်လာခြင်း ဖြစ်သည်။

ဤသေဆုံးမှုမှာ ရောဂါ စတင်ဖြစ်ပွားသည်ဟုဆိုသည့် မက္ကဆီကိုပြင်ပ၌ ပထမဆုံး ဖြစ်သည်။

ယခုအခါ ဝက်တုပ်ကွေးဟုခေါ်သော A/H1N1 ဗိုင်းရပ်စ် ပိုးကူးစက်မှု ၁၄၈ ခုကို နိုင်ငံ ၉ နိုင်ငံတွင် တွေ့ရှိရာ၊ အမေရိကန်တွင် ၉၁ မှု တွေ့ရှိရပြီး ၁ ဦး သေဆုံးခဲ့ပြီးဖြစ်ကြောင်းနှင့် မက္ကဆီကိုတွင် ၂၆ ဦး ကူးစက်ခံရကာ ၇ ဦးသေဆုံးပြီး ဖြစ်ကြောင်း ယမန်နေ့ရက်စွဲဖြင့် WHO က ဖော်ပြထားသည်။

ထို့အပြင် သြစတြေးလျားတွင် ၁ မှု၊ ကနေဒါ ၁၃ မှု၊ ဂျာမဏီ ၃ မှု၊ အစ္စရေး ၂ မှု၊ နယူးဇီလန် ၃ မှု၊ စပိန် ၄ မှုနှင့် ဗြိတိန် ၅ မှု ဖြစ်သော်လည်း သေဆုံးမှု မရှိသေးကြောင်း သိရသည်။

ဗိုင်းရပ်စ်ပိုးသည် လျင်မြန်စွာ ပျံ့ပွားနေသောကြောင့် ကမ္ဘာ့နိုင်ငံများတွင် ကူးစက်မှု တွေ့ရှိရသော နိုင်ငံများသို့ ခရီးသွားခြင်း မပြုရန် အကြံပေးတားမြစ်မှုများ ပြုလုပ်နေသကဲ့သို့၊ နိုင်ငံခြားသား ခရီးသွားများကိုလည်း သတိဖြင့် စောင့်ကြည့် စစ်ဆေးမှုများ ပြုလုပ်လျက်ရှိသည်။

အရှေ့တောင်အာရှ နိုင်ငံများအသင်း ASEAN ကလည်း ဒေသအတွင်း ဗိုင်းရပ်စ်ပျံ့ပွားလာမည်ကို ကာကွယ် တားဆီးနိုင်ရေး ဆွေးနွေးနိုင်ရန် အဖွဲ့ဝင် ၁ဝ နိုင်ငံမှ ကျန်းမာရေးဝန်ကြီးများအနေဖြင့် လာမည့်လ အစောပိုင်း တွင် ထိုင်းနိုင်ငံ ဘန်ကောက်မြို့၌ တွေ့ဆုံဆွေးနွေးနိုင်မည်ဟု မျှော်လင့်ထားကြောင်း သိရသည်။

ASEAN နိုင်ငံများတွင် ဗိုင်းရပ်စ်ကူးစက်မှု မတွေ့ရှိရသေးသော်လည်း ကြက်ငှက်တုပ်ကွေးနှင့် ဆာ့စ်ရောဂါ ဖြစ်ပွားခဲ့စဉ်က အရန်သင့် စုဆောင်းထားသော Tamiflu နှင့် Relenza ကဲ့သို့သော ဆေးဝါးများ အဆင်သင့် ရှိကြောင်းလည်း အဖွဲ့ကြီးက ပြောသည်။

ဗိုင်းရပ်စ်အသစ်ကြောင့် ဝက်မွေးမြူရောင်းချရေးနှင့် လေကြောင်းခရီးသွားလာရေး လုပ်ငန်းများကို ထိခိုက် လျက်ရှိပြီး၊ ကမ္ဘာ့အစုရှယ်ယာ ဈေးကွက်အချို့လည်း ထိခိုက်ကျဆင်းလျက်ရှိသည်။

ဝက်နှင့်ဆိုင်သော စီးပွားရေးလုပ်ငန်းကို ထိခိုက်မှုရှိနေသဖြင့် ဗိုင်းရပ်စ်အသစ်အား ဝက်တုပ်ကွေး Swine Flu ဟု နိုင်ငံတကာ၌ အမည်တပ်သုံးစွဲနေခြင်းအပေါ် အငြင်းပွားမှုများလည်း ဖြစ်ပေါ်နေသည်။

ထိုင်းနိုင်ငံတွင် ဝက်စီးပွားရေးသမားများက လက်ရှိကာလအထိ ဝက်များ ရောဂါဖြစ်၍ ဖျားနာသည်ကို မတွေ့ရ သေးဘဲ ဝက်တုပ်ကွေးဟု သုံးစွဲနေခြင်းသည် သင့်လျော်မှုမရှိကြောင်း မေးခွန်းထုတ်နေကြသကဲ့သို့ ထိုင်းကျန်းမာရေး ဝန်ကြီး မစ္စတာ ဝိထာရ ကယောက်ဖာရာဒိုင်ကလည်း ဝက်တုပ်ကွေး Swine Flu ဟု သုံးစွဲခြင်းသည် စားသုံးသူများကို အမြင်လွဲမှားစေကြောင်း ပြောသည်။ ထိုင်းနိုင်ငံတွင် ဗိုင်းစပ်အသစ်ကို Mexican flu ဟု ပြောင်းလဲ သုံးနှုန်းနေကြပြီဖြစ်သည်။

ထို့အတူ အမေရိကန် စိုက်ပျိုးမွေးမြူရေးဝန်ကြီး Tom Vilsack ကလည်း “ဒီရောဂါပိုးဟာ အစားအသောက် ကနေဖြစ်တာ မဟုတ်ပါဘူး။ Swine Flu လို့ မသုံးစွဲဖို့ အရေးကြီးပါတယ်။ ဝက်သားစားလို့ ဒီရောဂါ မဖြစ်ဘူး ဆိုတာ ဖော်ပြဖို့ လိုပါတယ်။ ကျနော်တို့ဟာ ကျန်းမာရေးအတွက် စိုးရိမ်သလိုပဲ စီးပွားရေး ထိခိုက်မှာကိုလည်း စိုးရိမ်ပါတယ်” ဟု ပြောသည်။

ပြင်သစ်အခြေစိုက် နိုင်ငံတကာ တိရစ္ဆာန်ကျန်းမာရေးအဖွဲ့ OIE ကလည်း ဗိုင်းရပ်အသစ်သည် ဝက်တုပ်ကွေး Swine Flu မဟုတ်ကြောင်း နှင့် ဗိုင်းရပ်စ် အသစ် ဝက်၊ ကြက်ငှက်နှင့် လူတွင် ဖြစ်တတ်သည့် တုပ်ကွေးပိုးများ ပေါင်းစပ်နေပြီး “North American” တုပ်ကွေးပိုးဟု ခေါ်သင့်ကြောင်း ပြောသည်။

ဗိုင်းရပ်စ်ကူးစက်လာမည်ကို စိုးရိမ်၍့ ခရီးသွားလာမှု ပိုမိုတင်းကျပ်ရန်နှင့် နယ်စပ်ပိတ်ရန် စဉ်းစားနေသည့် နိုင်ငံများ ရှိသော်လည်း WHO ကမူ ရောဂါပိုးကူးစက် ဖျားနာသူများအနေဖြင့် ဆေးဝါးကုသမှု ခံယူရန် နိုင်ငံတကာ ခရီးစဉ်များ အသုံးပြုရန် လိုအပ်နိုင်သောကြာင့် ယင်းသို့ မပြုကြရန် အကြံပြုထားသည်။

ထို့အပြင် ဝက်သားကို ကျက်သည်အထိ ချက်ပြုတ်စားသောက်သူများအနေဖြင့် ရောဂါပိုးကူးစက်ရန် စိုးရိမ်စရာ မရှိကြောင်းနှင့် လက်ကို ဆပ်ပြာဖြင့် စင်ကြယ်စွာ ဆေးကြောခြင်း၊ တုတ်ကွေးဖျားနာမှုဖြစ်ပါက ဆေးဝါး ကုသမှုကို ဂရုတစိုက် ခံယူသင့်ကြောင်းလည်း WHO က အကြံပြုထားသည်။

source by : မဇ္ဈိမ