မြစ်ဝကျွန်းပေါ်တွင် သောက်ရေရှားပါး

အေးလဲ့ | လွန်ခဲ့သည့် ၁၀ လက နာဂစ်မုန်တိုင်း တိုက်ခတ်ခဲ့သော မြစ်ဝကျွန်းပေါ်ဒေသတွင် သောက်သုံးရေ ရှားပါးနေကြောင်း ဒေသခံများနှင့် နာဂစ် မုန်တိုင်း အကူအညီပေးရေး အဖွဲ့များက ပြောသည်။

ဧရာဝတီတိုင်းတွင် သောက်ရေအခက်အခဲ ဤသို့ ကြုံတွေ့နေရသည် (ဓာတ်ပုံ - အေအက်ဖ်ပီ)

အထူးသဖြင့် ရှေ့လာမည့် နှစ်လ၊ သုံးလ အတောအတွင်း နွေရာသီအချိန်တွင် လပွတ္တာမြို့နယ် အတွင်းရှိ ကျေးရွာများ၊ ပင်လယ် ကမ်းရိုးတန်း တလျှောက်ရှိ ကျေးရွာများတွင် ရေရှားပါးသည့် အခက်အခဲ နှင့် ပိုမို ရင်ဆိုင်ရမည်ဟု နာဂစ်ဒေသ အရေးပေါ် ကူညီရေးအဖွဲ့ (မြန်မာနိုင်ငံ)မှ ပြောရေးဆိုခွင့်ရှိသူ ဦးမန်းမန်းက ပြောသည်။

မြစ်ဝကျွန်းပေါ် ဒေသခံများ အဖို့ သောက်သုံးရေနှင့် အစားအစာ အကူအညီများ ထပ်မံ လိုအပ် နေသေး သည်ဟုလည်း ဆိုသည်။

ဦးမန်းမန်းက “အဓိကက ပင်လယ် ဆားငန်ရေဝင်တဲ့ အတွက်ကြောင့် ဖြစ်တယ်။ တချို့ တောခေါင်တဲ့ နေရာတွေမှာ ရေမရတဲ့အတွက် လှေနဲ့ တချို့ကလည်း စက်လှေရှိတဲ့ သူက စက်လှေနဲ့ ရေချိုရှိတဲ့ ရွာတွေဘက်ကို မနက် ၆နာရီကနေ ည ၆ နာရီ အထိ ရေခပ် ကြရတယ်။ ရေတင် မကဘူး စိုက်ပျိုးသီနှံတွေလည်း ထင်သလောက် မဖြစ်ထွန်းဘူး။ ငါး ရှာဖမ်းလို့လည်း မရဘူး။ ရွာပေါင်း ၂၀၊ ၃၀လောက်က ရေရှားပါးမှုနဲ့ ကြုံတွေ့နေရတယ်” ဟုပြောသည်။

အကူအညီပေးရေးအဖွဲ့ များ လက်လှမ်းမီသည့် ရွာများတွင် ရေချိုကို ပိုးသတ်ခြင်း၊ ရေသန့်စက်ထောင်ခြင်း စသည့် နည်းလမ်းများဖြင့် ရယူပြီး စက်လှေများဖြင့် သောက်သုံးရေ သွားရောက် သယ်ဆောင်ပေးခြင်းများလည်း ပြုလုပ်ပေးလျက်ရှိသည့်။ သို့သော်လည်း အကူအညီပေးရေးအဖွဲ့များ ရောက်နိုင်ခြင်းမရှိသည့် ကျေးရွာများတွင် သောက်သုံးရေအတွက် အထူးစိုးရိမ်ရသည်ဟု အကူညီပေးရေး အဖွဲများက ပြောသည်။

လပွတ္တာမြို့ခံ တဦးက “ကျမတို့ မြို့ပေါ်ဘက်မှာတော့ ဒီလောက် မဆိုးသေးပေမယ့် တချို့ရွာတွေဘက်မှာတော့ ရေရှားတဲ့ အခက်အခဲတွေကို ကြုံနေရပြီလို့ ကြားပါတယ်။ တချို့ရွာတွေမှာလည်း အန်ဂျီအို အကူအညီနဲ့ တအိမ်ထောင်စုကို ရေသန့် တဂါလံလောက် ရတာ ရှိတယ်။ တချို့ မရတဲ့ နေရာဆိုရင်လည်း ရေသန့်ဘူး ၆၀၀ကျပ် လောက်နဲ့ ဝယ်သောက်ရ တာတွေလည်း ရှိတယ်” ဟုပြောသည်။

မုန်တိုင်းသင့် ဒေသခံများကို ဆေးကုသပေးခဲ့သူ လပွတ္တာမြို့နယ်မှ ဒေါက်တာ အေးကြူက “ဒီလိုသာ သွားမယ်ဆိုရင် ကြာလာရင် ဝမ်းပျက်ဝမ်းလျှော ရောဂါတွေ ဖြစ်ပွားလာနိုင်တယ်။ အခုတောင် လူနာတချို့ ဝမ်းပျက်ရောဂါနဲ့ ကျနော့်ဆေးခန်းကို ရောက်လာ ကြတယ်” ဟု ဧရာဝတီသို့ ပြောပြသည်။

“ဆင်းရဲချို့တဲ့သူများသည် သောက်ရေ ၀ယ်ယူခြင်း၊ သယ်ယူခြင်းတို့အတွက် အခက်အခဲ ဖြစ်နေကြောင်း” ကုလသမဂ္ဂ၊ အရှေ့တောင် အာရှ နိုင်ငံများ အသင်း၊ မြန်မာစစ်အစိုးရ တို့ဖြင့် ဖွဲ့စည်းထားသည့် သုံးပွင့်ဆိုင်အဖွဲ့က ဒီဇင်ဘာလ၌ ထုတ်ဝေသည့် အစီရင်ခံစာတွင် ဖော်ပြထားသည်။ သောက်သုံးရေ ပြတ်လပ်မှုဖြစ်လာနိုင်သည့်အတွက် စိုးရိမ်ရသည်ဟု အစီရင်ခံစာက ဆိုသည်။

လွန်ခဲ့သည် ၂၀၀၈ခုနှစ် မေလအတွင်းက မြန်မာပြည်တွင် တိုက်ခတ်ခဲ့သည့် နာဂစ်မုန်တိုင်းကြောင့် လူပေါင်း ၁၄၀ ၀၀၀ ခန့် သေကြေ ပျောက်ဆုံးခဲ့ရပြီး ၂.၄ သန်း အိုးအိမ်မဲ့ ဖြစ်ခဲ့ရသည်။ ဧရာဝတီ မြစ်ဝကျွန်းပေါ် ဒေသမှာ အဆိုးရွားဆုံး ခံခဲ့ရသည့် ဒေသ ဖြစ်သည်။

source by : http://www.irrawaddy.org/bur/index.php?option=com_content&view=article&id=781:2009-03-02-13-03-34&catid=1:news&Itemid=2