ကွတ်ခိုင် နမ့်ဖတ်ကာကြား ဓားပြတိုက်

မျိုးကြီး | ရွှေလီ(မဇျွိမ)။ ။ လက်နက်ကိုင် လူတစုက ရှမ်းပြည် (မြောက်ပိုင်း) မူဆယ်-မန္တလေး ကုန်သွယ်ရေး လမ်းမကြီးပေါ်တွင် ယခုလ ၁၀ ရက်နေ့က ကုန်ကားသမားများထံမှ ငွေတောင်းယူမှု ဖြစ်ပွားခဲ့သည်ဟု လမ်းကြောင်းပေါ်တွင် ပြေးဆွဲနေသော ကားသမားများ အပြောအရ သိရသည်။

ကွတ်ခိုင်နှင့် နမ့်ဖတ်ကာအကြား တောလမ်းတွင် မန္တလေးနှင့်မူဆယ် အဆင်းအတက်သွားနေသည့် ကုန်ကားကြီး အစီး ၂၀ ကျော်ကို အမည်မသိ လက်နက်ကိုင်တစုက ဓားပြတိုက်ခဲ့ခြင်းဖြစ်သည်။

''ဟုတ်တယ်ဗျ။ ဘယ်ကကြားလဲ။ ပြောလို့ သိပ်မကောင်းဘူးနော၊ မပြောချင်ဘူး။ ခံရတဲ့သူတွေတောင် မပြောဘူးဗျ'' ဟု ကားသမားတဦးက ပြောသည်။

ကားတစီးလည်း မီးလောင်မှု ဖြစ်ပွားခဲ့သေးကြောင်း သိရသည်။

''မီးလောင်တာက ပန်းသီးကား။ အပစ်ခံရတာက ပထမဦးဆုံးကား။ ပွန်းပဲ့ ဒဏ်ရာရ နဲနဲပါးပါးပဲ ရှိတယ်။ ကားက အစီး ၂၀ ကျော်တယ်'' ဟု သူက ထပ်ပြောသည်။

သို့သော်လည်း အချက်အလက် အသေးစိတ်ကို သူက ပြောဆိုနိုင်ခြင်း မရှိပါ။

အခင်းဖြစ်ပွားရာ နေရာသည် တောတောင်ထူထပ်ပြီး လူသူပြတ်လပ်သည့်အပြင် ပြည်သူ့စစ်များ အပါအ၀င် လက်နက်ကိုင် အဖွဲ့ပေါင်းစုံ သွားလာလှုပ်ရှားသည့် နေရာဖြစ်သည်။

source by : http://www.mizzimaburmese.com/news/breaking-newsbrief/2431-2009-02-12-14-01-07.html